بيت المعنى بعدما تغرّب
صارت لعندو نهايتو تقرب
ما ضل عندو للجدب مغـَّـيط
وساعة زمانو واقفه عا الحيط
تا تلتقي بتحريكة العقرب
وعندو حروف الضعف عاجنها
وعا الارض ما بيمشي توازنها
والعنكبوت مخيّطه تنانير
والبرغش البيكون راسو كبير
بيموت حتى يشتري منها
واربع قناطر عا الارض نامو
وعم يبصر التصليح ببنامو
والسقف عقلو طار عا المريخ
وفي حيط عندو اربع فساويخ
والريح عم بتعِدّ ايامو
واللحن ما عاود متل مانو
والوزن منّو هرّ عنوانو
بوجه النظر ساحب فرد مزراب
والقفل عم يلدغ بفتح الباب
بالرغم انو ساحب لسانو
0 comments:
إرسال تعليق