شروقي
الهام عيري السمع تا خبّرك شو صار
وقت اللي صار الهجر يمغط مسافاتو
بيتي وبيوت الشعر حطيت للايجار
ورايح "عا طول المدى" تا عيش جواتو
بحياة كل السما لا تمتلي ادوار
تا يضلّ عنا وعي يطلع عا درجاتو
سمعة "عصام" اعرفي ما في عَلَيها غبار
وبالحب قلبو رفض تغييرعاداتو
تا حل عقدة زمن هلق اخدت قرار
مفروض يمشي الحكي عا دروب اوقاتو
وحياة عينك انا مني عليك بغار
وخالص حناني لكي بيفرش ملفاتو
نحنا عا بال الدني جينا فرد مشوار
ويوم النهايه طلب نمشي عا دعساتو
عندك لأنو الجفا ماشي بدون عيار
قلبي عا حيط الغضب وقف تحياتو
قديش بدّو الصبر يغلي بحص عا النار
شفافي عا نتفة قطر من شفتك ماتو
شوفي جريح الهوى صاير بلا دبار
بنزول كبر العقل عم يطلع خواتو
0 comments:
إرسال تعليق