ضجر

شروقي

دموعي عا خدي بحر ومشاكلي اسطول

ومش عم بلاقي حدا تا يزين اقوالي

تخمين قرص الشقا عم ينحسب معمول

وحظي بقلب الصحف كيلين خلالي

كاسي بايدي فضي والوضع مش مقبول

وللعصر ما في بقا عنقود بالدالي

قاعد لوحدي انا وبسيرتي مشغول

وكلما لحقني الضجر عم يقعد قبالي

تا عيش ساعة زمن بالهم مش معقول

لازم بحكم القدر تتغير الحاله

منّو ضروري الشقا يبقى ظريف الطول

ويضل طول الوقت داير شغل بالي

ماشي عا درب العمر والاخ من ايلول

وايدي ما عاود حدا عالدرب هدّالي

وقديش عندي وجع بالراس مش عم قول

من هيك يوم الشعر مخنوق موالي

ومن هيك لما شفت انو الهوى مسؤول

ولقيت انو الضغط اعلى من العالي

ودّعت حالي ورحت عا عالم المجهول

ولما بيروح الوجع برجع على حالي