شروقي
يا روح صوب المضى من حاضري طيري
وجيبي شي نقفة حلم عا قياس تفسيري
ما ضل عندي عرق يستاهل المازات
تا صير فوق الارض اقدح مشاويري
عا كل مفرق حكي بيتقاطعو الكلمات
ولمين بدي انا اكتب اساطيري
هلّي عا درب العمر قطعت معي مسافات
لما لحقها المرض نقلت من الجيره
كانت قصيدة غزل صارت خمس كلمات
وما قال الها حدا بلا وزن بتصيري
وما عاد يمشي النظر معها بلا عوينات
والضغط "حب العلا" ومشاكلو كتيره
مبارح بلهفه مرقت بعد الحساسيات
وسألت عنها الدني قالت يا تعتيري
والاهل قالو شهر الها مع الاموات
ونحنا ما النا قلب نفتح الك سيره
وهونيك لما انطلب غني فراقيات
طِلْعت بجوّ الصمت دخنة سواكيري
واكلو خدودي دمع تا رفّخو الوجنات
وما قدرت لاقي حرف يزبط عا تفكيري
0 comments:
إرسال تعليق