شروقي
قومي يا روحي اضربي بنعش الزمن مسمار
يمكن عبكرا يجي وما تقوم القيامه
ما زال عندو الشقا بالجو استمرار
بيضل جرح الهوى مندوبنا السامي
بينك وبيني البعد خلَّف ولاد زغار
وقلّي زمان المرق بلسان ايامي
النسيان كلما انسأل عن ريحة التذكار
بيقول مَنّي خرج تا احفظ اسامي
جرّبت عند المسا انظم الك اشعار
وقلّك بجو الوحي عا كلمتي نامي
لكن لحقني الفشل من قلة الدبار
ورغم اشتياقي لكي ما انهزّ الهامي
مَرْقت عليي سنه عا شكلها ما صار
تركت عا طول المدى من وجودها علامه
التفكير فيها مشي مسافات عا البومار
وما عاد فوق الورق يتمَشْوَرو قلامي
معروف شوقي لكي شوق الحطب للنار
عا السكت انتي اقعدي وبوقف عَلى كلامي
كنت لحماكي وْصلت من اربعين نهار
لو ما عا درب العمر ضيّعت قدّامي
0 comments:
إرسال تعليق