الصفحات

ننشر في هذا الموقع أشعار الشاعر الكبير عصام ملكي

طل الحكي

لما خريف العمر عا بابي طرق
حلم اللي كان بجيبتي كدّو العرق
وضعت بانا وما بقيت اعرف شو بني
ولما لقيت مسكّره بوجهي الدني
قناني فراغ الوقت عبّيتن عرق

قلي الوحي من شوفة خيالي ارتعب
وزت الورق بالنار والريشه زعب
وساعة ما شفت معاكسه كل الظروف
صرت بدموعي نطّل جرين الحروف
لما عليهم سجل نفوسو التعب

دخل السما حبّيت صوتك اسمعو
وشكل الحلو طالع عا بالي اقشعو
الموسم الو مده طويله ما قَبَل
وجايي تا حتى ازرع شفافك قُـُـبَل
تا شوف كنو بكلمتين بيطلعو

ما عاد بدّي بها الدني ساير حدا
طل الحكي عا السكت وقوام انعدى
وهلق معي ما بقيت اعمل واجبات
شلت الخبر من بين دين الذكريات
تا علّم النسيان كيف المبتدا

0 comments:

إرسال تعليق