هدو العواصف بيتنا بحالة خطر
فصل الخريف خوات عا بالو خطر
وغاب القمر وتغيّبو كل النجوم
وصارت رياح البارده تعصر غيوم
وجرح التراب تقطّب بخيط المطر
ولما الهوا بالعمر كبرت وهرتو
ما عاود القنديل كفّى سهرتو
وبلّش يهز خواصرو الباب العتيق
وصار اللمع للرعد يضوي عا الطريق
تا يشوف كيف ووين وقعت صرختو
وبالغرفة الحيطانها مشّو البكي
وما في حدا بيقول الها شو بكي
دلفه متل ام الحزينه صايره
فتحت مع المزراب باب مسايره
وطلعت بساعه واختها بضاعة حكي
بيتي بعدما بطوفة مويي انسقف
ريح الشمالي لساعة خرابو زقف
ومش بس انو بكترة الضغط استوى
قرميدتين وجسر طارو بالهوا
وعا الارض غطو ست سبع تمان شقف
ها الطقس هم كبير عا راسي جلب
ونوم الهنا من قجة عيوني سلب
والشجرة العرّت جسدها عا الرصيف
كل نقطة مي كرمال الخريف
من وراقها عا البحر عم تاخد طلب
0 comments:
إرسال تعليق