طفر

اليوم العقل عم يقبع ضراسو

وجايي الوجع تا يربِّع جراسو

والشوم جايي ينوصل بالعيب

ومش بس انو دب فيي الشيب

التفكير عم يصبغ شعر راسو

بدّي مجال يحرك سكونو

وينزل معي وما يطلع جنونو

شعر اللي فرقع عا الحروف سياط

خف النظر عندو ربع قيراط

ومش عم يشوف منيح بعيونو

يا موطني لا تشدني ليها

العيشه الأَنا ببرم حواليها

جيابي يا ويلي توحّمو عا فرنك

ومش عم بتطلع ليرتي من البنك

رجوعي لعندك واقف عليها

عم واجه مصاريف بالجمله

وبيت الشعر عم يصرف الجمله

من وين بيجيبو القرش من وين

عا صهوتي ركَّب زماني دَين

بدّو الطفر تا يسابق العمله