بيتي لقيتو من بعد غيبه
مزوج الشيبه وخاطب العيبه
ولما عا حالو ضحكت الاحوال
ما عاود تصلّح معي بالمال
وقت اللي فضّت بالها الجيبه
حيط الشمالي صاير معشّب
والارض صار ترابها مخشّب
ورايح من السّلّم حجر مشلوح
مش بس انو خاطرو مجروح
من الشمس وجهو صاير مقشّب
بيتي بيجوز يطربق عليي
خلاصو زمط من بين ايديي
وهمه ما عندو ينزل على السوق
وجنينة الفيها كنت معجوق
نزلو عليها دموع عينيي
ويمكن التينه صابها طفره
صوب النهايه مولفه السفره
مش عم بتعمل بالطوابع عرض
والها شلش طالع عا وجه الارض
مفجّم ركابو وخلقتو صفره
ولوزه الزرعها ما قدر يجبي
مش عم بتعطي للنظر وجبه
اغصانها صارو بدون سنان
وكل الحلا عن جسمها هربان
متل العجوز القالعه الوجبه
هونيك قمت كتبت عا الورقه
بتسوى يا بيتي شي ربع ورقه
رح سجّل خبارك على المكشوف
شو بعد بدي شوف حتى شوف
ما ضل الا الاخ والحرقه
بحكم الزمان تغيّر العدّان
مَنّي انا وفلان مَنّو فلان
الجو الطبيعي هاجرو فصولو
وبعدن لهلق ناس بيقولو
شو باك ما بترجع على لبنان
0 comments:
إرسال تعليق