بيت الهجرتو بحلم ما تفسّر
قزازو بجنون العاصفه تكسّر
ولوزة المنها كنت عبّي كيس
غلغل بكل عمادها اليبّيس
وقت اللي شالو شلشها الانسر
والتينة الجابت الي حرقه
لما مرقت قدامها مرقه
بيّن عليي جهلها نصحان
اغصان عم تركب على اغصان
وبالكاد انو يخلـّفـو ورقه
وصارو عيوني يعملو سياحه
لما سندت عا حيط للراحه
مقابيل خوخه لونها شاحب
فيها غصن من عبّها ساحب
تا يناغش طرابين تفاحه
وحظ العريشه ما التقى بعيدو
فيها شلح طلّق عناقيدو
والحد منّو عالدرب فالت
بساعة سكر حسّبتها قالت
جدّك زرعني من قفا ايدو
عا كل كلمه القالها نادِم
هلي انحسب لوجودنا خادِم
احترقو السهول ونشّفو الوديان
وما في مواسم عالم بلبنان
تا يصير فينا نقشع اوادِم
0 comments:
إرسال تعليق