غرام الفج

من قلة التفكير الهامي انفجع

وما ضل عندي لحن يستهلك سجع

طلبت الوحي تا يطلّ من مطرح بعيد

ولما وقفت تا قلّها بيت القصيد

طلعوا  شفافي بآخ مليانه وجع

يمكن ع درب العمر ضاع المستوى

عندي غرام الفجّ ما عاد استوى

لا من بعيد الحلحله ولا من قريب

ببلاد حالي صرت عم بيّن غريب

وما في هوى بيهب بهبوب الهوا

جوّات قلبي من الشقا ماشي الحريق

ومتل الخلق  ما بقيت عم لاقي رفيق

ويوم العمى صاير بإيد المنتظر

خفّ النظر ما بقيت عم اشلح نظر

ان فضيو عيوني بأيش بقشع عالطريق

قلّي وجودي سجَّل نفوسو الخريف

ومنو تا خلّص بالدني ما عرفت كيف

مارق زماني عالحلا مرور الكرام

وكلما عالقمه وكاس يعزمني الغرام

جوع النفس عالطاوله بيرسم رغيف