يا واقفه بخلقة تدابيري
وبدك شعر بقلام تصويري
بالدفش صوبك ما طلع موال
ما في ثقافه واقفه بالبال
وعم يبرم عْلَى الحرف تفكيري
بينك وبيني واقع المشكل
ووحدي انا عا الصلح متوكل
عيوني وعيون الشعر بيجنو
فيكي. ولهلق تا عرفت انو
بخصرك حياتي معلقه بشنكل
لا تسأليني ها القلب كيفو؟؟
بالحب ما طلـَّـع مصاريفو
بالطول آخي عم تجي وبالعرض
قبالي زماني تكسّر على الارض
والذاكره لمت شقاقيفو
لغزك عرفتو وما قدرت حلّو
وعني المشاكل ما بقا يحلّو
مين العذابو من عذابي مين
هموم المعي الهم شي عشر سنين
تعويض بدهم قبل ما يفلّو
وهلق انا كامش حواليي
وحامل سلام بحضن ايديي
وراكض وراكي والركض ملهوف
وجسم الحكي ساقط بصف حروف
وناطر مزادك بالدني تا شوف
كنو شي يوم بيوقع عليي
0 comments:
إرسال تعليق