من بعد غيبه

يا مدوّبيني وغايبه عنيّ

مَنّي عا ذوقي بها الدني مَنّي

لعندي تعي لا تبعتي سلامات

قصة حياتي بيعرفو العنّات

تا تعرفيها اسألي عَنّه

منك شي بوسه مسوكره هاتي

تا يستلقى وجودها لهاتي

لا تحسبيني من الوضع هربان

ذاتي بصراحه عملتها فنجان

وجايي تا ادلق ذاتك بذاتي

دربي ما عادو علّمو جريكي

متيلة لقا تا التجي ليكي

وحياة رب الكون كنتي كون

ما كان لازم ترحلي من هون

تياب السفر ما بيطلعو عليكي

قالت عملّي عا الهوا حفله

وغنّي قصيده ما لها قفله

قلت المشي مش طالع لقدّام

منشان اتزوج وحي والهام

بدي شي "جو" شبين يوقفلي

الحاضر ما بدّي اخلطو بأمسي

من هيك صارت كلمتي همسه

سلوكك شهاده بالعمر ما حاز

تا يضل عندك اصبع بينعاز

لا تصلّبي بصابيعك الخمسه